Fransiya poytaxti Parij shahrida dzyudo bo‘yicha “Katta Dubulg‘a” turkumiga kiruvchi yilning nufuzli musobaqalaridan biri boshlandi. Dunyoning ko‘zga ko‘ringan polvonlari orasida O‘zbekiston dzyudochilari ham mazkur turnirda o‘z imkoniyatlarini sinovdan o‘tkazyapti, deb xabar beradi “Olamsport”.
Kecha, 17-oktabr kuni erkaklar -60, -66 va -73 kg vazn toifalarida tatamiga chiqdi. -60 kg vazn toifasida O‘zbekiston sharafini himoya qilgan Sharofiddin Lutfullayev yarim finalga qadar mag‘lubiyatsiz yetib borib, yakunda bronza medali bilan taqdirlandi.
Sharofiddin o‘z ishtirokini ikkinchi davradan boshladi va bu bosqichda kanadalik Serxio Pessoani mag‘lub etdi. Uchinchi davrada turkiyalik Bekir Ozludan ustun keldi. Chorak finalda braziliyalik Erik Takabatakeni mag‘lubiyatga uchratdi.
Yarim finalda fransiyalik Vinsent Limarega imkoniyatni boy berib qo‘ydi. Bronza medali uchun kechgan bahsda esa shveysariyalik Lyudovik Chamartindan ustun ekanligini amalda isbotladi.
-66 kg vazn toifasida tatamiga chiqqan O‘zbekiston terma jamoasi a’zosi Dostonjon Xoliqulov uchinchi davrada mag‘lubiyatga uchradi. Yaqindagina Toshkentda o‘tgan Gran-Pri turniri g‘olibi Mirali Sharipov esa kutilmaganda ilk bosqichdayoq mag‘lubiyat alamini totib ko‘rdi.
Izoh (0)