Бугун, 16 октябрь куни Қирғизистон ҳуқуқни ҳимоя қилиш органлари ходимлари аввалроқ тергов изоляторидан қочган террорчи Дониёр Қодиралиевни йўқ қилди, дея хабар бермоқда «ТАСС» республика ИИВ матбуот котибига таяниб.
Жиноятчи республика пойтахтидаги аҳоли яшайдиган даҳада ходимга пичоқ билан ҳужум қилишга уриниш чоғида отиб ташланган. Қодиралиев Қирғизистонда тақиқланган «Жайшул Маҳдий» диний-экстремистик ташкилот аъзоси бўлган.
Изолятордан қочган ўта хавфли жиноятчиларнинг қолганини қидириш бўйича тадбирлар давом этмоқда.
Эслатиб ўтамиз, Қирғизистоннинг Чуй вилоятида 12 октябрь, душанбага ўтар кечаси 50-рақамли тергов изоляторидан тўққиз нафар маҳкум уч нафар қўриқчини ўлдириб, қочиб кетди. Бундан ташқари, жазони ижро этиш муассасасининг бир нафар ходими яраланган. Полиция тез орада олиб қочилган автомобилни топиб, беш нафар жиноятчини қўлга олганди. Қолган уч жиноятчи озодликда қолмоқда.
Изоҳ (0)