Тошкентда 2017 йилгача ўқув-тадқиқот тўқимачилик «Технопарки» қурилади. «Газета.uz» хабарига кўра, лойиҳа «Ўзбекенгилсаноат» компанияси томонидан Жанубий Корея Савдо, саноат ва энергетика вазирлиги билан ҳамкорликда амалга оширилади.
Хабар беришларича, технопаркда Тошкент тўқимачилик ва енгил саноат институти учун ўқув ва тадқиқот дастурлари ишлаб чиқилади, юқори қўшимча қийматли маҳсулотлар (тайёр матолар, тикув-трикотаж буюмлари)ни ишлаб чиқариш соҳасидаги мутахассислар ўқитилади, тўқимачилик йўналишидаги ноу-хаулар ўрганилади ва тадқиқот ишлари олиб борилади.
Режага кўра, лойиҳа Жанубий Корея ҳукуматининг «Тараққиётга расмий ёрдам» дастури грант маблағлари ҳисобидан молиялаштирилади, грант маблағлари қурилиш-монтаж ишлари, ускуналарни сотиб олиш ва ўрнатиш, шунингдек, ходимларни ўқитиш учун йўналтирилади. Технопаркнинг қоралама режаси Жанубий Корея мутахассислари томонидан ишлаб чиқилган.
Режа бўйича, технопаркнинг уч қаватли корпусларидаги 4000 квадрат метр майдонда ўқув хоналари, анжуман заллари, кўргазма майдончалари, лабораториялар, офислар, оранжерея ва бошқа объектлар жойлашади. Икки қаватли бинода эса умумий майдони 1500 квадрат метрдан ортиқ бўлган илмий-тажбира лабораторияси фаолият олиб боради.
Технопаркдаги беш қаватли биноларнинг томларига эса оранжерея ва майсали қопламаси бор боғларни жойлаштириш кўзда тутилган. Бино замонавий конструкциялардан қурилиши режалаштирилган. Ёндош ҳудудлар юқори чидамли безакдор плиталар билан қопланади ҳамда яшил ҳудуд ва фавворалар билан безатилади.
Изоҳ (0)