Ўзбекистон жаҳон пахта экспортидаги ўзининг 7 фоизлик улушини сақлаб қолади

Ўзбекистон 2015/16 йилги мавсумда жаҳон пахта бозорида ўзининг 7 фоизлик улушини сақлаб қолади, яъни 500 минг тонна пахта толасини экспорт қилади. Бу ҳақда, Тошкентда очилган 11-халқаро пахта ярмаркаси доирасида ташкил этилган анжуман маълумотларига асосланиб, «Газета.uz» хабар бермоқда.

Пахта бўйича халқаро маслаҳат қўмитаси (ICAC) маълумотларига кўра, ташқи бозорга пахта толасини етказиб бериш бўйича АҚШ (29 фоиз), Ҳиндистон (16 фоиз) ва Покистон (10 фоиз) етакчиликни сақлаб қолмоқда. 2015/16 йилги мавсумда жаҳон бўйлаб пахта толаси ишлаб чиқариш ҳажми 9,2 фоизга — 23,9 миллион тоннагача пасаяди, унинг истеъмоли эса 2 фоизга — 25 миллион тоннагача ошади.

ICAC’нинг дастлабки баҳолашларига кўра, пахта ишлаб чиқарувчи асосий мамлакат — Хитойда талабнинг пасайиши ва айни вақтда Бразилия, Ҳиндистон ва Ўзбекистонда пахта ҳосилининг юқори бўлиши муносабати билан, 2015/16 йилги мавсумда бир фунт (450 грамм) пахтанинг халқаро нархи 67-68 сент миқдорида сақланиб қолади.

«Ҳукумат пахта толасини қайта ишлаш бўйича янги ишлаб чиқаришларни ташкил этиш ва мавжуд қувватларни ошириш ҳисобига экспортни қисқартириш сиёсатини мақсадли равишда давом эттирмоқда», — деди конференция очилишида Ўзбекистон бош вазири Шавкат Мирзиёев. Унинг сўзларига кўра, «самарали логистика тизими ҳамда оптимал йўналиш ва коридорларнинг танланиши ўзбек пахта толасининг ўз вақтида барча истеъмолчиларга етиб боришини таъминлайди».

Ўзбекистон Ташқи иқтисодий алоқалар, инвестициялар ва савдо вазирлиги маълумотларига кўра, ўзбек пахтасининг жорий мавсумдаги асосий харидорлари яна Бангладеш (29 фоиз), Хитой (26 фоиз), Жанубий Корея (7 фоиз) ва Эрон (5 фоиз) бўлади. «Сўнгги йиллардаги ўртача ҳосилдорликдан келиб чиқиб, 2015 йилги пахта ҳосилидан тола тайёрлаш ҳажми 1 миллион тоннага яқин бўлади», — деди «Ўзпахтасаноат» уюшмаси бошқаруви раиси Фарҳод Омонов.

«Ўзбекенгилсаноат» компанияси маълумотларига кўра, 2015—2020 йилларда мамлакат енгил саноат соҳаси модернизацияси учун 1 миллиард долларга яқин маблағ йўналтирилади. Дастур пахта толасини маҳаллий даражада қайта ишлашни жорий йилдаги 44 фоиздан 2020 йилда 70 фоизга олиб чиқишни, ўз навбатида, текстил маҳсулотлари экспорти ҳажмини ҳозирги 800 миллион доллардан 1,5 миллиард долларга кўтаришни назарда тутади.

Ўзбекистонда ҳар йили 3,5 миллион тоннага яқин пахта хомашёси ва 1—1,2 миллион тонна пахта толаси тайёрланади. Сўнгги 10 йил ичида пахта толасининг ички истеъмоли мамлакатда 15 фоиздан 40 фоизгача ошди.