Европа футбол уюшмалари иттифоқи (УЕФА) президенти Мишель Платини ўзи раҳбарлик қилаётган ташкилот ижроия қўмитасининг бўлажак мажлисида қатнашадиган бўлса, Халқаро футбол федерацияси (ФИФА)нинг этика бўйича қўмитаси унга қарши янги иш очади. Бу ҳақда «ТАСС» хабар бермоқда.
УЕФА 15 октябрь куни Нон шаҳридаги ўз қароргоҳида ташкилотга аъзо барча 54 мамлакат вакиллари иштирокида фавқулодда мажлис ўтказади. Фавқулодда мажлис Платини, ФИФА президенти Йозеф Блаттер, шунингдек, ФИФА бош котиби Жером Валькенинг лавозимидан ва футбол билан боғлиқ фаолиятдан 90 кунга четлатилгани билан боғлиқ. Бундан ташқари, шу куни УЕФА ижроия қўмитасининг фавқулодда мажлиси ҳам бўлади.
«Четлатиш футбол билан боғлиқ фаолият билан шуғулланишни, хусусан, УЕФА мажлисларида қатнашишни тақиқлайди. Акс ҳолда, бу этика кодексининг бузилиши деб ҳисобланади ва қўшимча терговга сабаб бўлади, бунда мазкур қоидабузарликнинг юз беришига кўмак берган бошқа футбол амалдорлари ҳам тергов қилинади», — деди ФИФАнинг этика бўйича қўмитаси тергов палатаси матбуот котиби.
Эслатиб ўтамиз, ФИФАнинг этика бўйича қўмитаси Платинининг четлатилганини 8 октябрь куни эълон қилди. Қарор аввалроқ ўтказилган тергов маълумотлари асосид қабул қилинган. Платини ҳам, у билан бирга четлатилган Блаттер ҳам мазкур қарор устидан ФИФА апелляция қўмитасига шикоят қилган.
Изоҳ (0)