Москванинг Басманний суди Жанна Немцованинг отасининг ўлими юзасидан Рамзан Қодиров ва бошқа юқори даражали чечен расмийларини сўроқ қилиш ҳақидаги талабини рад этди. Бу ҳақда «РБК» хабар бермоқда.
Судья Елена Ленская бу қарорни қонунга кўра, ҳеч ким тергов жараёнига аралашишга ҳақли эмаслиги билан изоҳлади. «Тергов ёки тезкор қидирув ҳаракатларини ўтказиш масаласини терговчи мустақил ҳал этади, суд тергов устидан назорат қилувчи тизим эмас», дея таъкидлаган у.
«Немцовнинг ўлдирилиши юзасидан тергов салкам саккиз ойдан бери чўзилмоқда, жиноий ишни энг тажрибали терговчилар кўриб чиқяпти, аммо натижа йўқ, — дея ўз навбатида норозилигини билдирган Немцов оиласининг адвокати Вадим Прохоров. — Қотилликнинг буюртмачилари ҳам, ташкилотчилари ҳам топилгани йўқ, фақат ижрочилар қўлга олинган, холос».
Прохоров барча айбланувчилар Чеченистондан эканлигига эътибор қаратиб, жиноятнинг илдизлари ҳам шу ерга бориб тақалишини тахмин қилди. У қонунга кўра, терговчилар текширув жараёнлари қандай кетишини ўзи белгилашини тан олди, бироқ улар муҳим гувоҳларни сўроқ қилишни асоссиз рад этмасликлари кераклигини билдирган.
Эслатиб ўтамиз, олдинроқ Басманний суди Жанна Немцованинг Тергов қўмитаси Рамзан Қодировни отасининг ўлими билан боғлиқ жиноий иш доирасида сўроқ қилишдан бош тортгани юзасидан шикоятини кўриб чиқиши маълум қилинган эди.
Изоҳ (0)