Ҳиндистонда «вафот этган» бемор танаси ёрилишидан бир дақиқа аввал ҳушига келди

Мумбай полицияси шаҳар касалхоналаридан бирида 45 ёшли беморнинг ўлимига олиб келиши мумкин бўлган ҳодиса юзасидан текширув олиб бормоқда. «Сегодня.ua» хабарига кўра, вафот этган деб ҳисобланган шахс танаси ёрилишидан бир дақиқа аввал ҳушига келган.

Қайд этишларича, шаҳар автобус бекатларининг бирида бир эркак ҳушсиз ҳолда топилган. Тиббиёт ходимлари уни госпиталга олиб боргач, навбатчи шифокор Роҳан Рохекар томир уришини текширмай, жабрланувчини вафот этган, дея қайд этган.

Маҳаллий қонунчиликка кўра, вафот этган беморнинг «қайта тирилишига» имконият бериш учун икки соат давомида махсус жойда сақланиши лозим. Рохекар эса жасадни дарҳол ўликхонага элтишни буюрган. Орадан бироз вақт ўтиб, мурдани ёрмоқчи бўлган тиббиёт ходимлари бемор нафас олаётганини пайқаган, «ўлик» ҳам тўсатдан кўзини очган.

NDTV телеканалининг хабар беришича, юз берган воқеа ҳақида хабар топган навбатчи шифокор ўлим ҳақидаги ҳужжатларни йўқ қилишга уринган, ҳодиса жойига келган полициячиларни узоқ вақт давомида хонасига киритмаган. Мазкур иш бўйича суриштирув олиб бораётган назоратчининг сўзларига кўра, шифокорни жиноий жавобгарликка тортиш ҳақидаги қарор касалхонадаги ички текширув якунига етганидан сўнг қабул қилинади.

Госпитал бош шифокори Сулеман Мерчантнинг қайд этишича, шифокорлар жабрланганнинг томир уришини сезмаслиги мумкин, шунинг учун вафот этгани қайд этилган бемор дарҳол ўликхонага олиб борилмайди. Унинг қайд этишича, Рохекар иш бошлаганига ҳали кўп бўлмаган ва у кўплаб амалиётлардан бехабар, шунга қарамай, унга хайфсан эълон қилинган.

Айни дамда «қайта тирилган» бемор тўйиб овқатланмаслик ва аниқланган инфексион касалликка қарши даволанмоқда.