Ўзбекистон термасининг собиқ футболчиси Дилмурод Назаров вафот этди

1976 йилнинг 12 апрелида туғилган Дилмурод Назаров 10 октябрь куни 39 ёшида вафот этди. Бу ҳақда «Championat.asia» хабар бермоқда.

Профессионал фаолиятини 1992 йил «Пахтакор» сафида бошлаган. Икки йил давомида ушбу клуб шарафини ҳимоя қилган Дилмурод Назаров Ўзбекистон чемпиони (1992) ва Ўзбекистон кубоги (1993) соҳибига айланди.

1993 йил Қозоғистоннинг «Ордабаси» клубида ўйнаб, яна «Пахтакор»га қайтди. Уч йил ичида «шерлар» сафида яна чемпион (1998) ва кубок соҳиби (1997) бўлди. 1995 йилда Ўзбекистоннинг энг яхши футболчиси сўровномасида 2-ўринни банд этди.

1999 йилда Тошкентнинг «Трактор» ва Чимкентнинг «Ордабаси» клубида фаолият олиб борди.

Кейинги йил «Пахтакор»да, 2001 йилда эса «Сурхон» клубида ўйнаган. Қисқа муддат Қозоғистоннинг «Тараз» жамоаси шарафини ҳимоя қилди. Қозоғистонда «Қайсар», «Ясси Сайрам» ва «Ордабаси» каби клубларда ўйнади.

2006 йилда Наманганнинг «Навбаҳор» клуби сафида ўйнаб, футоболчилик фаолиятини якунлади.

Ўзбекистон миллий терма жамоаси сафида 1995—1997 йилларда 10 та ўйинда майдонга тушган. 1996 йилда Осиё Кубогида иштирок этган.