Қатар пойтахти Доҳа шаҳрида давом этаётган бокс бўйича катталар ўртасидаги жаҳон чемпионатида ярим финалчилар номи маълум бўлди, деб хабар беради Ўзбекистон Миллий олимпия қўмитаси матбуот хизмати.
Эътиборлиси, ярим финалга йўл олган спортчилар орасида олти нафар ўзбекистонлик боксчи бор.
Бу борада Ўзбекистон Куба терма жамоасидан кейин иккинчи ўринда бормоқда. Кубаликларнинг етти нафар боксчиси ярим финалда рингга кўтарилади. Умуман ярим финалга Куба ва Ўзбекистон терма жамоалари билан бирга Россия ва Озарбайжондан – 4 нафардан, Ирландиядан – 3 нафар, Хитой, Украина ва Қозоғистондан – 2 нафардан, Филиппин, Жазоир, Ҳиндистон, Беларусь, Бразилия, Таиланд, Марокаш, Миср, Буюк Британия ва Франциядан – 1 нафардан боксчи ярим финалга етиб келди.
Кеча, 10 октябрь куни бўлиб ўтган чорак финал баҳсларида Ўзбекистондан Муроджон Аҳмадалиев (-56 кг) таиландлик рақибини, Элнур Абдураимов (-60 кг) мўғулистонлик рақибини, Фазлиддин Ғоипназаров (-64 кг) италиялик рақибини, Бектемир Мелиқўзиев (-75 кг) Россия вакилини, Баҳодир Жалолов (+91 кг) иорданиялик рақибини ва ниҳоят Элшод Расулов (-81 кг) қозоғистонлик Адилет Ниязимбетовни мағлубиятга учратди.
10 октябрда рингга кўтарилган ўзбекистонлик боксчилардан фақат Рустам Тўлаганов кубалик Эрисланди Савонга имкониятни бой бериб қўйди.
Изоҳ (0)