2015 йил бошидан бери Ўртаер денгизи орқали Европага 580 мингдан ортиқ муҳожир ва қочоқлар келди. Бу ҳақда, Халқаро миграция ташкилоти маълумотларига асосланиб, «Европейская правда» хабар бермоқда.
9 октябрь ҳолатига кўра, 580 238 нафар қочоқ Европага денгиз йўли орқали келган. Айни вақтда, қарийб 3 минг қочоқ йўлда ҳалок бўлган.
Энг кўп — 441 527 нафар муҳожир Грецияга келиб тушган, Италияга 135 599 муҳожир етиб келган. Эътиборли томони, октябрнинг алоҳида кунларида Грецияга келаётган муҳожирлар сони кескин ошди — ҳар куни 7 минг нафаргача муҳожир келди; сентябрь охирида мамлакатга кунига 4,5 минг нафар қочоқ келаётганди.
Халқаро миграция ташкилотининг изоҳига кўра, сўнгги бир неча кун ичида янги келаётган муҳожирлар сонининг ошиши иқлим шароитларининг ёмонлашуви билан боғлиқ. Аввалроқ, Европа Иттифоқининг янги режасига мувофиқ, Италиядаги қочоқларнинг дастлабки гуруҳлари Швецияга кўчирилгани ҳақида хабар берилганди.
Изоҳ (0)