NASA астронавти Стив Суонсон Халқаро космик станцияга «Манчестер Юнайтед» клуби байроғини олиб чиқди. Байроқни космонавтга инглиз клубининг россиялик ишқибози Алексей Яковлев берган, деб хабар қилади Mirror.
Америкалик Стив Суонсон ХКСга баннерни олиб чиққач, унинг бир неча суратларини олди. Москва яқинида яшовчи Яковлев байроқнинг фазовий экспедицияга йўл олган «Союз ТМА-12М» кемасида эканлигини тасдиқловчи махсус сертификат олди.
«Қилган ишимдан фахрланаман, чунки ‘МЮ’ мен учун кўп нарсани англатади. Бизнинг байроқ космосда ҳилпирамоқда, ҳеч ким ундан ҳам баландроққа чиқа олмайди», — деди Яковлев. У бу иши билан клубга фазовий энергия бермоқчи бўлганини қўшимча қилди.
Бундан ташқари, Яковлев 21 октябрь куни Европа Чемпионлар Лигаси доирасида ЦСКА ва «Манчестер Юнайтед» жамоалари ўртасида бўлиб ўтадиган учрашувдан олдин байроқни инглиз клуби вакилларига топширмоқчи эканлигини маълум қилди.
Изоҳ (0)