26 сентябрь куни Марказий Осиё минтақасидаги ягона реклама фестивали — Red Jolbors Fest’нинг 2015 йилги танлови ғолиблари номи маълум бўлди. «PR.uz» хабарига кўра, фестиваль Гран-приси Ўзбекистон вакилларига насиб этди.
Ҳар йили Бишкек шаҳрида ташкил этиладиган Red Jolbors Fest реклама фестивали таълим маърузалари ва ярмаркалар воситасида, шунингдек, энг яхши реклама намуналари танлови орқали Марказий Осиё маркетинг ва реклама бозорини ривожлантиришга қаратилган.
2015 йилги танловга олти — «Реклама ва радио роликлари», «Дизайн», «Босма ва ташқи реклама», Digital & Mobile, «Реклама кампанияси», «Медиа» тоифалари бўйича 580 дан ортиқ ариза келиб тушди. Уларнинг 149 таси шорт-листдан ўрин олган бўлса, 80 таси совринларга лойиқ кўрилди.
Хусусан, танловнинг халқаро ҳакамлар ҳайъати 7 та олтин, 26 та кумуш ва 47 та бронза мукофотни ўз эгаларига топширди. Танлов якунларига кўра, энг кўп совринларни қўлга киритгани учун, Қозоғистоннинг Green Penguin Media компанияси «Фестиваль агентлиги» мақомини қўлга киритди.
«Йил мижози» мақоми эса Қозоғистоннинг Kaspi bank банкига насиб этди — банк буюртмаси асосида GForce Grey компанияси томонидан тайёрланган реклама ишлари энг кўп совринлар эгасига айланди. Ўзбекистоннинг Abdusalyamov Production томонидан тайёрланган The Black Quail ролиги эса фестиваль бош соврини — Гран-прини қўлга киритди.
The Black Quail - Born in Uzbekistan from Ravshan Abdusalyamov on Vimeo.
Қайд этиш жоиз, Abdusalyamov Production томонидан мазкур реклама ролиги «Реклама ва радио роликлари» категориясининг Corporate Film ва Film Craft йўналишларида фестиваль олтинларини қўлга киритди.
Изоҳ (0)