Facebook ижтимоий тармоғи асосчиси Марк Цукерберг муҳожирларнинг лагерларини интернетга уламоқчи. Бу ҳақда у 26 сентябрь, шанба куни БМТнинг барқарор ривожланиш саммити доирасида Нью-Йоркда ташкил этилган тадбирда маълум қилди, дея хабар бермоқда «ТАСС».
Цукербергнинг сўзларига кўра, алоқа қочоқларга имкон қадар тезроқ ёрдам олиш ва ўз оилалари билан алоқани сақлаб туришга ёрдам беради. Унинг қўшимча қилишича, ҳозирги вақтда Ер аҳолисининг фақат ярми интернетдан фойдаланмоқда, холос.
«Агар сиз одамларнинг жаҳоннинг исталган нуқтасида озиқ-овқат, тиббий ёрдам, таълим олишлари ва меҳнат билан банд бўлишларини истасангиз, бутун дунёни алоқа билан боғламоқ керак. Интернет ҳозиргидек фақат уч миллиард кишига тегишли бўлмаслиги керак», — дейилади Цукербергнинг U2 рок-гуруҳи етакчиси Боно билан ҳамкорликда The New York Times газетасида чоп этилган мақоласида.
Facebook раҳбари намуна тариқасида Эфиопия ва Танзаниядаги фермерларни келтирган — улар қишлоқ хўжалиги маҳсулотларининг харид нархларини кузатиш, маҳсулотнинг омборларда борлигини текшириш, ноқулай об-ҳаво шароитидаги хавфлардан суғуртани расмийлаштириш учун интернетдан самарали фойдаланади.
Изоҳ (0)