Ўзбекистон Республикаси Олий хўжалик суди пленумининг навбатдаги мажлиси бўлиб ўтди. Унда Олий хўжалик судининг судьялари, Олий Мажлис Сенати аъзолари ва Қонунчилик палатаси депутатлари, ҳуқуқни муҳофаза қилувчи ва назорат қилувчи органларнинг масъул ходимлари, ҳуқуқшунос олимлар, видеоконференцалоқа тизими орқали Қорақалпоғистон Республикаси, вилоятлар хўжалик судлари судьялари иштирок этди, деб хабар беради ЎзА.
Мажлисни Ўзбекистон Республикаси Олий хўжалик суди раиси К.Комилов бошқарди.
Пленум мажлиси муҳокамасига киритилган «Ўзбекистон Республикаси Олий хўжалик суди пленумининг айрим қарорларига ўзгартиш ва қўшимчалар киритиш тўғрисида»ги қарор лойиҳаси хўжалик судлари томонидан ишларни кўришда Хўжалик процессуал кодекси ҳамда бошқа қонун ҳужжатларига киритилган янги нормаларни аниқ ва бир хилда қўлланилишини таъминлашга қаратилган. Унда корпоратив низоларни кўриб чиқишнинг ўзига хос хусусиятлари, давлат божини тўлаш юзасидан имтиёзларни қўллаш, ишларни кўришда процессуал муддатларга риоя этиш, солиқ тўловчи томонидан солиққа оид бир неча ҳуқуқбузарлик содир этилган тақдирда молиявий санкциянинг миқдорини ҳисоблаш усуллари, молиявий санкцияни қўллаш тўғрисидаги ишларни кўришда судлар томонидан инобатга олиниши лозим бўлган ҳолатлар юзасидан батафсил тушунтириш берилган.
Сўзга чиққанлар кўриб чиқилган масала тадбиркорлик субъектларининг ҳуқуқлари ва қонуний манфаатларини суд орқали ишончли ҳимоя қилишда муҳим аҳамият касб этишини алоҳида таъкидлади.
Муҳокама этилган масала юзасидан тегишли қарор қабул қилинди.
Мажлисда Ўзбекистон Республикаси Бош прокурори И.Абдуллаев иштирок этди.
Изоҳ (0)