ФИФА рейтингида Ўзбекистон аёллар термаси икки поғона юқорилади

ФИФА аёллар терма жамоаларининг янги рейтингини эълон қилди. Унга кўра, Ўзбекистон аёллар терма жамоаси аввалги ойдаги эгаллаб турган ўрнидан икки ўрин юқорилаган ҳолда жаҳон рейтингида 43-поғонада, Осиё қитъаси рейтингида эса 9-ўринда бормоқда. Бу ҳақда Ўзбекистон футбол федерацияси матбуот хизмати хабар қилмоқда.

Осиё қитъаси рейтингини эса сўнгги жаҳон чемпионати финалчиси – Япония терма жамоаси бошқармоқда. Осиёнинг энг кучли жамоаси айни дамда рейтингнинг 4-ўринда бормоқда. Қитъа рейтингида Япониядан кейинги ўринларни КХДР (6), Австралия (9) ҳамда Хитой (15) терма жамоалари эгаллаб турибди.

Аёллар терма жамоалари рейтингини эса ҳамон амалдаги жаҳон чемпиони АҚШ терма жамоаси бошқариб турибди. Кучли учликдан, шунингдек, Германия ҳамда Франция терма жамоалари ўрин олган.

Осиё қитъаси рейтингида эса кучли ўнлик қуйидагича кўриниш олган:

1. Япония (4).2. КХДР (6).3. Австралия (9).4. Хитой (15).5. Жанубий Корея (17).6. Таиланд (29).7. Ветнам (33).8. Хитой Тайпейи (37).9. Ўзбекистон (43).10. Мьянма (47).

Жаҳон рейтингининг тўлиқ кўриниши билан ФИФА расмий сайтида танишиш мумкин.