«Ўзтрансгаз» компанияси 10 октябрга қадар тугалланиши белгиланган 2015—2016 йиллар куз-қиш мавсумига тайёргарлик ишлари доирасидаги вазифаларни деярли тўлиқ бажариб бўлди. Бу ҳақда ЎзА хабар бермоқда.
Газ таъминотида узилишларга йўл қўймаслик мақсадида газ қувурларининг 70,6 километри капитал таъмирланди, 105,5 километр газ коммуникацияси реконструкция қилинди.
7 минг 725 километрга яқин қувур зичлик синовидан ўтказилиб, ҳаво босими ёрдамида тозаланди. 5 минг 800 километрдан ортиқ ер ости қувури ҳолати текширилди, 72 минг 364 газ тақсимлаш пункти тафтишдан ўтказилди.
Ҳозирги вақтда 942 минг 344 хонадонга суюлтирилган газ етказиб берилмоқда. Бунда ойлик қуввати 30 минг 894 тоннани ташкил этувчи 45 газ тўлдириш станцияси, 209 маиший газ баллонларини тарқатувчи сервис маркази, 222 суюлтирилган газ ташувчи вагон-цистерна, 58 автотцистерна хизмат кўрсатмоқда.
Аҳолини суюлтирилган газ билан таъминлашни янада яхшилаш мақсадида компания 2014 йилда республика миқёсида 20 газ тўлдириш шохобчаси ишга туширган бўлса, жорий йилда яна 14 шундай объект фойдаланишга топширилиши кўзда тутилган.
2014 йилда аҳолига 527 минг 963 дона маиший газ баллони етказиб берилган бўлса, жорий мавсумда 608 минг 734 дона баллон тарқатиш белгиланган.
Хизмат кўрсатиш сифатини янада такомиллаштириш мақсадида ўтган йилда 31 MAN русумли автотцистерна, 55 ISUZU русумли махсус автомашина харид қилинди. Ҳозирги вақтда ушбу техникалар сонини янада кўпайтиришга қаратилган саъй-ҳаракатлар якунига етказилмоқда.
Бундан ташқари, мамлакат бўйича автомобилларга газ тўлдиришга мўлжалланган 475 компрессор станцияси фаолият кўрсатмоқда. 2020 йилга бориб уларни 809 тага етказиш режалаштирилган.
Изоҳ (0)