Ўзбекистон кенг полосали стационар интернетнинг кириб бориши бўйича дунёда 130-ўринни эгаллади

Ўзбекистон кенг полосали стационар интернетнинг кириб бориши бўйича 189 мамлакат ичида 130-ўринни эгаллади. Бу ҳақда БМТ ҳисоботига таяниб, UzDaily хабар берди.

Ушбу ҳисобот 2015 йил 21 сентябрь куни Нью-Йорк шаҳрида БМТнинг рақамли тараққиёт учун кенг полосали алоқа бўйича Комиссияси томонидан тақдим этилди.

Ҳужжатга кўра, 2014 йил якунлари бўйича Ўзбекистонда кенг полосали стационар интернетнинг кириб бориши ҳар 100 кишига 1,3 абонентни ташкил қилади. 2013 йилда эса ушбу кўрсаткич 1,1 абонентдан иборат бўлган.

Мобил интернетнинг кириб бориши бўйича Ўзбекистон 109-ўринни эгаллади, бу кўрсаткич ҳар 100 кишига 23,9 абонентни ташкил этмоқда.

Шунингдек, тадқиқот натижалари 2014 йилда интернетга эга хўжаликлар 10,5%, (2013 йилда 9,5%), уланиш имкони бўлган жисмоний шахслар улуши 43,6 фоизга (2013 йилда 38,2%) тенглигини кўрсатди. Ушбу кўрсаткич бўйича Ўзбекистон дунёнинг 191 мамлакати ичида 93-ўринни (2013 йилда 100-ўрин), 144 та ривожланаётган давлатлар ичида эса 48-ўринни (2013 йилда 53-ўрин) эгаллади.

Эслатиб ўтамиз, 2013 йил якунлари бўйича Ўзбекистон кенг полосали стационар интернетни жорий қилиш бўйича 190 мамлакат ичида 128-ўринни эгаллаган эди.