Россия Бош прокуратураси «Внуково» аэропортида юз берган ва Total корпорацияси раҳбари Кристоф де Маржерининг ўлимига сабаб бўлган Falcon самолёти авиаҳалокати бўйича айблов хулосасини тасдиқлашдан бош тортди. Бу ҳақда, Meduza’нинг ёзишича, айбланувчилардан бири, диспетчер Александр Кругловнинг турмуш ўртоғи маълум қилди, унинг сўзларини жиноят иши бўйича бош айбланувчи — Владимир Мартиненконинг адвокати Александр Карабанов тасдиқлади.
«Коммерсант» маълумотларига кўра, айбланувчилар яқин вақт ичида озодликка чиқиши мумкин, чунки 21—22 сентябрь кунлари уларни ҳибсда ва уй қамоғида сақлаш муддати якунига етади. Ҳибс муддатларини узайтириш бўйича мажлислар ҳақида адвокатларга маълумот берилмаган.
Бортида экипажнинг уч аъзоси ва бир йўловчи — Total корпорацияси раҳбари Кристоф де Маржери бўлган Falcon самолёти 21 октябрга ўтар кечаси «Внуково» аэропортидан учиб кетиш вақтида учиш-қўниш йўлагида қор тозалаш машинаси билан тўқнашиб, ҳалокатга учраган, самолёт бортидаги барча ҳалок бўлган.
Falcon ҳалокати иши бўйича биринчи бўлиб қор тозалаш машинаси ҳайдовчиси Владимир Мартиненко ҳибсга олинди. Тергов қўмитаси маълумотларига кўра, у машинани маст ҳолатда бошқарган. Кейинроқ Мартиненко ўз айбини тан олди.
Кейинчалик аэропортнинг турли хизматларидан бир неча киши ҳибсга олинди ва уй қамоғига жойлаштирилди. Ҳибсга олинганларнинг адвокатлари ва ҳамкасблари сўроқлар кўплаб қоидабузарликлар билан амалга оширилганини бир неча бор таъкидлади.
Ўз навбатида, Россия Тергов қўмитаси тергов-суриштирув ишлари давомида ҳеч қандай қоидабузарликлар юз бермагани, тергов сифатли ва қисқа муддатда ўтказилганини таъкидлаб келмоқда.
Изоҳ (0)