2015 йилнинг 19 сентябрь куни 2013 йил 8 июлда имзоланган Ўзбекистон Республикаси билан Испания Қироллиги ўртасида икки ёқлама солиққа тортишга йўл қўймаслик ҳамда даромад ва капитал солиқларини тўлашдан бош тортишнинг олдини олиш тўғрисидаги Конвенция кучга кирди. Бу ҳақда Ўзбекистон Ташқи ишлар вазирлиги матбуот хизмати хабар бермоқда.
Конвенция Ўзбекистон ва Испания юридик ва жисмоний шахсларининг ўз давлатларида ёки шерик давлатда олган даромадларини икки марта солиққа тортилмаслигини таъминлайди. Шу йўсинда, мазкур халқаро шартнома ўзаро инвестицияларни жалб қилиш ҳамда икки давлат компания ва тадбиркорлари ўртасида савдо-иқтисодий ҳамкорликни ривожлантиришга имкон беради.
Шунингдек, ушбу Конвенция солиққа оид ҳуқуқбузарликларни олдини олиш мақсадида Ўзбекистон ва Испания солиқ идоралари ўртасидаги ҳамкорликни ҳам назарда тутади.
Мазкур Конвенциянинг тўлиқ матни билан www.lex.uz сайтида танишиш мумкин.
Изоҳ (0)