«Ўзбекистон ҳаво йўллари» миллий авиакомпанияси Канаданинг CAE компаниясида ишлаб чиқарилган янги тренажёр – A320 самолётининг Full-flight симуляторини қабул қилиб олди, дея хабар бермоқда «12news.uz». ЎзАнинг ёзишича, ушбу тренажёр ёрдамида учувчилар юқори даражада реал шароитларга яқинлаштирилган ҳолатда парвоз этиш кўникмасини мустаҳкамлайди ва ноодатий вазиятларда ҳаракатланишни машқ қилади.
A320 самолётининг Full-flight симулятори авиация хавфсизлиги, юқори малакали кадрлар тайёрлаш тизимининг самарадорлигини ошириш борасидаги янги босқичдир. «Ўзбекистон ҳаво йўллари» миллий авиакомпанияси Ўқув-машғулот марказининг тренажёр мажмуасида ўрнатилаётган CAE компаниясининг янги ишланмаси замонавий компьютер таъминоти, қўзғалиш ва визуализация тизимлари билан жиҳозланган. У ўзида A320 самолёти учувчилар хонасини мужассамлаштирган.
Айни пайтда канадалик мутахассисларнинг биринчи гуруҳи монтаж ишларини амалга оширмоқда. Сентябрь ойи охирида мутахассисларнинг иккинчи гуруҳи дастурий таъминотни ва тренажёр ускуналарини созлашга киришади. Бу ишлар якунланганидан сўнг Миллий авиакомпания учувчи-йўриқчилари CAE компанияси мутахассислари билан тизимни синовдан ўтказади ва қабул қилади.
Тренажёрни баҳолаш натижалари асосида Ўзбекистон «Дававианазорат» инспекцияси томонидан янги симулятордан фойдаланишга сертификат берилади. Тренажёрни техник таъминлаш мақсадида биринчи босқичда канадалик мутахассислар Ўқув-машғулот марказида авиакомпаниянинг саккиз нафар муҳандисини ўқитади. Уларга мустақил хизмат кўрсатиш учун рухсат берилади. Янги Full-flight симулятори ноябрь ойининг охирида фойдаланишга топширилиши режалаштирилмоқда.
Бугунги кунда Миллий авиакомпаниянинг тренажёр мажмуасида Boeing-757/767, A320 ҳаво кемаларининг замонавий тренажёрлари ва Ўзбекистонда ишлаб чиқарилган «Ил-114-100» самолётининг ўзига хос Full-flight симулятори мавжуд. FFS A320 фойдаланишга топширилиши билан хорижий ўқув марказларини жалб этмаган ҳолда Ўзбекистонда A320 аэробуслари учувчиларини тайёрлаш ва қайта тайёрлаш учун зарур асос яратилади.
Изоҳ (0)