Шу кунларда ўзбекистонлик бир гуруҳ журналистлар Хитойда сафарда бўлиб турибди. ХХРнинг Ўзбекистондаги элчихонаси кўмагида амалга оширилган мазкур сафар давомида ўзбек журналистлари бу мамлакатнинг қатор давлат органлари вакиллари билан учрашиш имкониятига эга бўлмоқда. Хусусан, 17-сентябр куни Маданият вазирлиги расмийлари билан учрашув бўлиб ўтди. Бу ҳақда «12news.uz» веб-сайти вакили Шуҳрат Орипов Хитойдан «Дарё» учун махсус хабар бермоқда.
Учрашувда журналистларга ХХРнинг Марказий Осиё давлатлари, хусусан, Ўзбекистон билан маданий соҳадаги алоқаларнинг аҳволи ва истиқболлари хусусида маълумотлар берилди.
ХХР Маданият вазирлигининг Ташқи алоқалар департаменти Евросиё бўлими раҳбари ўринбосари Гуо Цзе икки мамлакат маданий алоқалари изчил ривожланиб бораётганлигини қайд этди. Айниқса, ўзаро ҳамкорликда анъанавий ўтказиб келинаётган турли маданий тадбирлар алоқалар ривожига ҳисса қўшмоқда. Масалан, Ўзбекистонда ўтказиладиган «Шарқ тароналари» халқаро мусиқа фестивалида Хитойдан доимий тарзда вакиллар қатнашиб келади.
Мазкур фестивалда Хитой вакили бўлган Jiangsu Women’s Orchestra гуруҳининг гран-при соҳиби бўлганлиги юзасидан Маданият вазирлиги вакили муносабат билдириб, бу воқеа Хитой маданий ҳаётидаги муҳим қувончли воқеалардан бири бўлганлигини, «Шарқ тароналари» халқаро мусиқа фестивали аллақачон жаҳон миқёсидаги йирик маданий мулоқот майдонига айланганлигини таъкидлади.
Гуо Цзе бундай нуфузли фестивалда бош совринни қўлга киритиш шарафли ва ҳар доим ҳам насиб этмайдиган воқеа эканлигини билдирди.
Изоҳ (0)