Мексика президенти Энрике Пеня Нето Миср ҳарбий-ҳаво кучлари ўқ ёғдириши оқибатида ҳалок бўлган саккиз нафар мексикаликнинг жасади тергов билан боғлиқ жараёнлар якунлангандан сўнг келгуси ҳафтада ватанига етказилишини маълум қилди. Бу ҳақда «RIA Novosti» хабар бермоқда.
Давлат раҳбари унинг самолётида 18 сентябрь, жума куни Мехикога келтирилган Мисрда жароҳатланган ҳамюртларини касалхонага бориб кўрди. Унинг таъкидлашича, мамлакат ҳукумати мазкур фожиа юз берган пайтдан бошлаб вазиятга аралашган ва Миср расмийларига ҳодисани чуқур ўрганиш ҳамда етказилган зарарни қоплаб бериш талаб этилган норозилик нотаси юборган. Қоҳира Мексика томони талабларини қондиришга тайёр эканлигини билдирган.
Эслатиб ўтамиз, 13 сентябрь, якшанба куни Миср ҳарбий-ҳаво кучлари мамлакат марказидаги ал-Ваҳат ҳудудида тўртта автомобилда кетаётган мексикалик сайёҳлар ҳамда уларга ҳамроҳлик қилаётган мисрликларни террорчилар билан адаштириб, ўққа тутгани оқибатида саккиз нафар мексикалик ва тўрт нафар мисрлик ҳалок бўлганди.
Изоҳ (0)