БМТ Тараққиёт Дастурининг «Савдо ривожланишига кўмаклашиш» лойиҳаси томонидан «Марказий Осиёда минтақавий савдони ривожлантириш» Дастури ҳамкорлигида халқаро мутахассис А. Кузнецовни (Латвия) жалб қилган ҳолда экспорт/импорт жараёнлари бўйича рухсатномалар беришга қаратилган бизнес жараёнларини соддалаштириш ва реинжиниринг қилиш масалаларига қаратилган давра суҳбати ташкил қилинди. Бу ҳақда БМТ ТД ва Ўзбекистон Республикаси Ташқи иқтисодий алоқалар, инвестициялар ва савдо вазирлигининг биргаликдаги пресс-релизида айтилади.
Давра суҳбати мобайнида халқаро мутахассис томонидан BPMN (Business Process Modeling Notation — бизнес жараёнларини моделлаштириш учун шартли белгилар/нотациялар тизими) методологиясини қўллаш орқали фитосанитария сертификати, санитар-гигиеник хулоса, мувофиқлик ва келиб чиқиш сертификатларини олиш жараёнларининг соддалаштирилган вариантлари тақдим этилди. Бизнес жараёнини соддалаштириш учун эксперт томонидан қўлланилган услуб ва жиҳатлар иштирокчиларда алоҳида қизиқиш уйғотди.
Юқорида қайд этилган сертификатларни бериш жараёнинг такомиллаштирилган вариантларини кўриб чиқиш натижасида уларни соддалаштириш борасида бир қатор имкониятлар мавжудлиги аниқланди. Булар, мурожаат этувчилар билан мулоқот, молиявий-хўжалик масалалари ечимига кетадиган вақтни қисқартириш ва умуман олганда, бутун жараён бандларини соддалаштириш кабилардир.
Хусусан, реинжиниринг услубларини қўллаш натижасида келиб чиқиш сертификатларини 30 фоизга (автоматизацияда — 87%), мувофиқлик сертификатини — 38 фоизга (автоматизацияда — 77%), санитария-эпидемилогик хулосани 6 фоизга (автоматизацияда — 81%), фитосанитария сертификатини — 34 фоизга (автоматизацияда — 81%)гача бериш жараёнларини соддалаштириш мумкинлиги эътироф этилди.
Давра суҳбатининг натижаларига биноан, «Электрон ҳукумат» тизимини ривожлантириш Марказининг бўлим бошлиғи И. Насруллаев халқаро эксперт олиб борган ишларни юқори баҳолаб, бизнес жараёнларни такомиллаштириш ҳисобига вазирлик ва идораларнинг фаолияти самарадорлигини ошириш бўйича тақдим этилган таклифларни келгусида амалий қўлланишида қизиқиш билдирди.
«Савдо ривожланишига кўмаклашиш» лойиҳаси «Марказий Осиёда савдо ривожланишига кўмаклашиш – III босқич» минтақавий лойиҳасининг Ўзбекистоднаги миллий компоненти. Ушбу лойиҳа давлат органларини халқаро ва минтақавий савдони ривожлантириш бўйича салоҳиятини янада ошириш, савдога кўмаклашувчи ташкилотларни қўллаб-қувватлаш, аҳолининг савдо ва ишлаб чиқариш бўйича салоҳиятини ва қишлоқ хўжалик маҳсулотларини қайта ишлаш бўйича илғор усулларни амалиётга тадбиқ қилиш орқали аҳоли даромадларини ошириш ва янги иш жойларини яратишда ёрдам беришга қаратилган.
Изоҳ (0)