«ВимпелКом Лтд» компаниялар гуруҳи «Евросиё» ҳудуди Дмитрий Шуковнинг «Билайн-Ўзбекистон» бош директори этиб тайинланганини маълум қилди. «Газета.uz»нинг ёзишича, Шуков фаолиятини «ВимпелКом Лтд»дан ташқарида давом эттиришга қарор қилган Владимир Петров ўрнини эгаллайди.
«Дмитрий ҳам телекоммуникация, ҳам ўзга соҳалардаги тезкор ривожланиб бораётган бозорларда катта тажрибага эга. У бизнеснинг рақамли трансформацияларига янги суръат бера олишига, шунингдек, янги маҳсулотлар ва сервисга аҳамият берган ҳолда Ўзбекистонда ишга туширилган лойиҳаларни муваффақиятли ривожлантира олишига ишонаман», — дейди «ВимпелКом Лтд» компаниялар гуруҳи «Евросиё» ҳудуди бош директори Михаил Герчук.
«‘Билайн-Ўзбекистон’ хизматларини технологик ривожлантириш, шунингдек, маълумотлар узатиш борасида, мобил молия хизматлари ва мижозларга хизмат кўрсатишни такомиллаштириш — буларнинг барчасини биринчи навбатдаги масалалар деб ҳисоблайман. Хизматлар сифати ва инновациялар — бренднинг муваффақиятли келажаги гаровидир ва ишонаманки, «ВимпелКом Лтд»нинг янги стратегияси муваффақиятли амалга оширилиши Ўзбекистон бозорида ажойиб натижаларни кўрсатади», — дейди Дмитрий Шуков.
Дмитрий Шуков 1997 йилда «Бошқарув» мутахассислиги бўйича Санкт-Петербург ҳарбий алоқа академиясини аъло натижалар билан тамомлаган, шунингдек, Стокгольм иқтисод мактабида малака оширган. У 1990 йилда телекоммуникация соҳасидаги фаолиятини бошлаб, 2002 йилнинг июлида DIXIS рақамли электроника ва уяли алоқа салонлари Россия тармоғининг бизнесни ривожлантириш бўйича директор лавозимини эгаллаган.
Шуков 2004 йилнинг август ойида TELE2 Russia мобил операторининг дистрибуция ва савдолар бўйича директори лавозимини эгаллади. 2006 йилнинг октябрь ойидан 2015 йил сентябрь ойига қадар МТС ва АМК «Система» гуруҳи таркибида фаолият юритган: аввал Корпоратив марказнинг маркетинг бўлимида, кейинчалик эса Туркманистон, Ўзбекистон ва Ҳиндистондаги бўлинмаларига бошчилик қилган.
Изоҳ (0)