Саратон касаллигига чалинган АҚШнинг собиқ президенти Жимми Картер шифокорлар томонидан белгиланган кимётерапиянинг ярмисини ўтаб бўлди. Бу ҳақда у Атланта шаҳридаги ўзининг хайрия маркази ҳомийлари олдидаги чиқишида маълум қилди, дея хабар бермоқда «ТАСС».
— Даволанишим учун тавсия этилган дори — «Пембролизумаб»нинг номини ўргангунимча нақ уч ҳафта вақтим кетди, — дея ҳазиломуз таъкидлаган 90 ёшли Картер. — Аниқланган тўртта ўсимтани бартараф этишга қаратилган даволаниш муваффақиятли кетмоқда. Бунинг самараси тез орада билинишига ишончим комил.
Эслатиб ўтамиз, Жимми Картерга ўтган ойда жигар саратони ташҳиси қўйилган, аммо кейинчалик хавфли ўсимталар бошқа аъзолар, жумладан, мияга ҳам ўтгани аниқланганди. Собиқ давлат раҳбари Атлантанинг Эмори университети қошидаги касалхоналардан бирида даволанмоқда.
Изоҳ (0)