Тошкентдаги Халқаро ҳамкорлик марказида 15 сентябрь куни Савдо-иқтисодий ҳамкорлик бўйича Ўзбекистон – Уммон ҳукуматлараро комиссиясининг навбатдаги мажлиси бўлиб ўтди. Бу ҳақда ЎзА хабар бермоқда.
Тадбирда икки мамлакатнинг ташқи иқтисодий алоқалар, савдо-саноат, сармоя, банк-молия, нефть-газ, кимё саноати, енгил саноат, авиаташув, сайёҳлик, маданият, илм-фан, қишлоқ хўжалиги, озиқ-овқат саноати, архив иши соҳаларида фаолият кўрсатаётган вазирлик ва идоралари, фирма ва компаниялари вакиллари иштирок этди.
Ўзбекистон ва Уммон ўртасида савдо ва иқтисодий ҳамкорлик, инвестицияларни ўзаро рағбатлантириш ва ҳимоялаш, даромадларнинг икки томонлама солиққа тортилишига йўл қўймаслик ҳамда даромад ва капитал солиқларни тўлашдан бош тортишни бартараф этиш тўғрисида ҳукуматлараро битимлар имзоланган. Шунингдек, ҳаво транспорти қатнови, нефть-газ, кимё, қурилиш, олий таълим, сайёҳлик, сармоя каби соҳаларда изчил ҳамкорлик йўлга қўйилган.
Мажлисда Ўзбекистон ва Уммон ўзаро товар айирбошлаш ҳажмини янада ошириш, кенг кўламли савдо-иқтисодий ва сармоявий ҳамкорликни кенгайтиришдан манфаатдор экани таъкидланди. Уммон ишбилармон доираларининг Ўзбекистондаги инвестициявий муҳитга, акциядорлик жамиятлари фаолиятига қизиқиши ортиб бораётгани қайд этилди, икки мамлакат ўртасида савдо-иқтисодий ва сармоявий ҳамкорликни янада ривожлантиришнинг истиқболли йўналишлари ҳақида сўз юритилди.
Савдо, сармоя, банк-молия, транспорт ва транспорт коммуникациялари, фан ва маданият, логистика, сайёҳлик, озиқ-овқат саноати каби соҳалардаги алоқаларни янада кенгайтириш, Уммон компанияларини Ўзбекистондаги хусусийлаштириш жараёнига кенг жалб этиш, қўшма корхоналарни, ўзаро товар айирбошлаш ҳажмини кўпайтириш, биргаликда ўзаро фойдали лойиҳаларни ишлаб чиқиш ва амалга ошириш масалалари муҳокама қилинди.
Уммон делегацияси аъзолари Ўзбекистон Ташқи ишлар вазирлигида ҳам музокара ўтказди. Меҳмонлар General Motors Powertrain Uzbekistan қўшма корхонаси ҳамда Турин политехника университети фаолияти билан танишди.
Изоҳ (0)