12 сентябрь куни Тошкент вилоятининг Ангрен шаҳри, Бўстонлиқ, Юқори Чирчиқ, Ўрта Чирчиқ, Оҳангарон туманларида яшовчи Ўзбекистон фуқароларидан таркиб топган «Тошкент вилояти-1» ва «Тошкент вилояти-2» гуруҳлари зиёратчилари Мадинаи Мунавварадан Макка шаҳрининг «Азизия аш-Шималия» минтақасида жойлашган тўрт буржли «Аброж ал-Муҳаммадия» меҳмонхонасига етиб келди, деб хабар беради Дин ишлари бўйича қўмита расмий сайти.
«Зиёратчиларга тажрибали имом-хатиблар Азимжон Алимжонов ва Фарруҳ Курганов етакчилик қилмоқда. Тушликдан сўнг барча зиёратчиларга умра давомида бажариладиган амаллар, унинг шаръий ҳукмлари жумладан, фарз, вожиб, суннатлари юзасидан элликбошилар томонидан яна бир бор пухта тушунча ва тавсиялар берилди. Зеро, ҳаж ва умра амалларини шаръий талабаларга монанд бажариш зарурий шарт ҳисобланади. Бунга Қуръони каримнинг ‘Бақара’ сураси ‘Ҳаж ва умрани (арконлари ила) Аллоҳ (ризоси) учун тўлиқ адо этинглар’ 196-ояти калимаси ҳам далилдир», — дейилади хабарда.
Ҳожилар шу куни кечасига қадар ҳордиқ олди. «Ҳарам» масжидида зиёратчилар сийраклашганларидан сўнг махсус автобусларда у ерга етиб келди.
«Зиёратчиларимиз қариялар ва аёлларни эҳтиёт қилган ҳолда ‘тавоф’ ва ‘саъй’ амалларини бажарди. Умра амалларини бажариш давомида улар оила аъзолари ва яқинлари, умуман, барча юртдошларимиз ҳақларига дуолар қилиб, Аллоҳдан жондан азиз ва муқаддас Ватанимизга тинчлик, барқарорлик, фаровонлик ҳамда муҳтарам Юртбошимиз раҳбарликларида янада равнақ топишни ихлос билан сўради.
Умра амалларини тартиб билан ва муваффақият билан адо этган зиёратчиларимиз меҳмонхонага чуқур таассуротлар билан қайтди», — дейилади Дин ишлари бўйича қўмита расмий сайти хабарида.
Изоҳ (0)