“Navoiyazot”dagi favqulodda holatda odamlar halok bo‘lgani haqidagi xabarlar rad etildi

Navoiy viloyati hokimligining “Do‘stlik bayrog‘i” gazetasi 11-sentabr sonida 2-sentabr kuni soat 8:50 da “Navoiyazot” AJning 1-sexida yuz bergan favqulodda holat yuzasidan axborot berdi.

“2-sentyabr kuni ertalab soat 8:50 da “Navoiyazot” AJning 1-sexida favqulodda holat sodir bo‘ldi. Buning natijasida 11 kishi yengil tan jarohati oldi. Bu holatdan jabrlanganlar korxona hududidagi shifoxonaga yetkazilib, kerakli tibbiy yordam ko‘rsatildi. Jarohatlanganlarning 7 nafari shifoxonada yotib davolanishni rad etishdi, 1 nafariga esa keyingi kun javob berildi”, — deyiladi gazeta xabarida.

Qayd etishlaricha, korxona ma’muriyati va barcha xodimlarining tezkor va uyushqoqlik bilan olib borgan harakatlari natijasida hodisa oqibatlari bartaraf etilib, sexning ishlab chiqarish ko‘rsatkichlari avvalgi darajaga ko‘tarildi. O‘z navbatida, “Do‘stlik bayrog‘i” gazetasi “ayrim shubhali elektron ommaviy axborot vositalarining ushbu holat yuzasidan yoritgan xabarlari haqiqatga to‘g‘ri kelmasligi” haqida yozadi.

“Ularning sahifalarida kimyo zavodi rahbariyati jabrlanganlar va “qurbon bo‘lgan”lar haqidagi ma’lumotlar hamda voqea sabablarini sir tutishayapti, degan bo‘hton gaplar urchib ketdi. Internetda berilayotgan ma’lumotlar atayin “shov-shuv” ko‘tarish uchun o‘ylab topilgan, bo‘rttirilgan. Ushbu xatti-harakatlar saytlarning ommabopligini oshirish maqsadida, go‘yoki yirik kimyo ishlab chiqarish korxonasida yuz bergan “portlash” atrofida “pashshadan fil yasash”dan o‘zga narsa emasdir”, — deb yozadi gazeta.

Xabar berishlaricha, hozirgi vaqtda bo‘lib o‘tgan voqeani tekshirish uchun maxsus komissiya tuzilib, voqea sabablarini o‘rganish ustida ish olib borilmoqda.