Ўзбекистонда ногиронлик масалалари бўйича маслаҳат кенгаши тузилади
Ўзбекистон Меҳнат ва аҳолини ижтимоий муҳофаза қилиш вазирлиги ҳамда ногиронларнинг жамоат ташкилотлари Ногиронлик масалалари бўйича маслаҳат кенгашини ташкил этиш бўйича битимни ишлаб чиқишга киришди. Бу ҳақда, вазирлик ахборот хизматига асосланиб, «Gazeta.uz» хабар бермоқда.
Кенгаш олдига қўшма тадбирлар, маслаҳатлашувлар ва музокаралар ўтказиш, қўшма лойиҳалар ва режаларни ишлаб чиқиш ва амалга ошириш, ўзаро қўллаб-қувватлаш ва ахборот алмашиш, шунингдек, бандлик ва аҳолини ижтимоий муҳофаза қилиш соҳасидаги норматив-ҳуқуқий ҳужжатлар ва ижтимоий-иқтисодий дастурларни ишлаб чиқиш ва амалга оширишда ногиронларнинг жамоат ташкилотлари иштирокини таъминлаш каби вазифалар қўйилган.
Меҳнат ва аҳолини ижтимоий муҳофаза қилиш вазирлиги ногиронларнинг ташкилотларини маслаҳат кенгашида ва битимни ишлаб чиқишда қатнашишга чақириб қолади. Мурожаат учун телефон: 239-41-30. E-mail: nogironmaslahat@umail.uz.
