11 сентябрь куни Макка шаҳридаги Ал Ҳарам масжидига қурилиш крани қулаши натижасида ўзбекистонлик зиёратчилар жабр кўрмади, дея хабар бермоқда Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита матбуот хизмати.
Ишчи гуруҳ томонидан ўзбекистонлик ҳожиларни ташувчи автобусларнинг ҳаракати тўхтатилди. Шаҳарда табиий офат оқибатларини тугатиш ишлари охирига етгунга қадар зиёратчиларнинг меҳмонхонадан чиқиши чекланди. Бўрон бошланган вақтда меҳмонхонадан ташқарида бўлган ҳожиларни қайтариш чоралари кўрилди.
11 сентябрь ҳолатига кўра, Макка шаҳрида 2683 нафар ўзбекистонлик зиёратчи бўлган. Зиёратчиларнинг асосий қисми табиий офат вақтида меҳмонхонада бўлган. Ал Ҳарамда бўлган ўзбекистонлик зиёратчилар соғ-саломат меҳмонхонага етиб келган. Соат 24.00 да ҳожиларни Ал Ҳарамга ташувчи автобусларнинг ҳаракати қайта йўлга қўйилди. Ҳозирда ўзбекистонлик ҳожилар ибодатларини давом эттирмоқда.
Эслатиб ўтамиз, кучли бўрон оқибатида Ал Ҳарам масжидининг кенгайтириш ишлари кетаётган жанубий қисмида жойлашган кранлардан бири масжиднинг Каъбатуллоҳ атрофида тавоф амали бажариладиган майдонининг жанубий қисмига қулаб тушди.
Саудия Арабистони Фуқаро мудофааси томонидан берилган расмий маълумотларга кўра бахтсиз ҳодиса натижасида 107 киши ҳалок бўлган, 238 нафари тан жароҳатлари олган.
Макка шаҳри мутасадди ташкилотлари томонидан қутқарув ишлари ташкил этилди. Ал Ҳарам масжиди ва унинг ён-атрофидаги кўчалар бир соат давомида ёпилди.
Изоҳ (0)