Britaniya kengashi raisi ser Vernon Jeym Ellis 7-8-sentabr kunlari ilk rasmiy tashrif bilan O‘zbekistonda bo‘ldi. “Gazeta.uz” xabariga ko‘ra, u bir qator vazirlar, shuningdek, Britaniya kengashining loyihalari ishtirokchilari va hamkorlari bilan uchrashdi.
“Ser Vernon Ellisning ikki kunlik tashrifi — ta’lim va madaniyat sohasidagi ikki tomonlama munosabatlar uchun juda muhim voqeadir. Bu Britaniya kengashiga 2010-yildan beri rahbarlik qilayotgan ser Vernonning O‘zbekistonga ilk tashrifidir”, — deydi O‘zbekistondagi Britaniya kengashi direktori Mark Krossi.
Uning so‘zlariga ko‘ra, ser Vernonga Toshkent juda yoqqan, u Amaliy san’at muzeyida bo‘lib, O‘zbekiston amaliy san’ati va an’anaviy o‘zbek musiqasidan juda ta’sirlangan. Britaniya kengashi raisi Toshkentdagi Rahimovlar sulolasining sopol maktabida sopol idishlarni tayyorlash jarayonida ham qatnashishga ulgurdi.
“Janob Vernon vazirliklarning rahbarlari bilan O‘zbekiston va Buyuk Britaniya o‘rtasida oliy va o‘rta maxsus ta’lim sohasidagi hamkorlikning keyingi istiqbollari borasida kelishib oldi. Shuningdek, O‘zbekistondagi Britaniya kengashining san’at sohasidagi yangi dasturi bo‘yicha va ingliz tilini o‘qitish sohasidagi hamkorlik dasturlarini ko‘paytirish bo‘yicha ham kelishuvlarga erishildi”, — deydi Krossi.
Tashrif yakunlariga ko‘ra, ser Vernon shunday dedi: “O‘zbekiston bilan hamkorlik aloqalarimiz a’lo darajadagi natijalarga ega va biz Buyuk Britaniyaning ulkan merosi hamda ayni vaqtda O‘zbekiston uchun istiqbolli ehtiyoj bo‘lgan ingliz tili sohasidagi yangi loyihalarni sabrsizlik bilan kutmoqdamiz. Tabiiyki, Britaniya kengashi mazkur yo‘nalishda asosiy hamkor hisoblanadi”.
Izoh (0)