Рамит дарасида Тожикистон мудофаа вазири собиқ ўринбосари Абдуҳалим Назарзода жиноий гуруҳининг яна 18 нафар аъзоси қўлга олинди, 134 дона ўқотар қурол ва ўқ-дорилар мусодара қилинди, дея хабар бермоқда «РИА Новости» ИИВга таяниб.
Бундан ташқари, мудофаа вазири собиқ ўринбосарининг қуролли гуруҳи етти аъзоси ихтиёрий равишда таслим бўлган.
ИИВ маълумотларига кўра, 4 сентябрдан буён операциялар давомида Назарзоданинг жами 130 га яқин тарафдорлари қўлга олинган, яна 22 нафари йўқ қилинган.
Эслатиб ўтамиз, Тожикистон Ички ишлар вазирлиги 4 сентябрь куни истеъфога чиқарилган мудофаа вазирининг ўринбосари Абдуҳалим Назарзодани мудофаа вазирлигининг Душанбедаги марказий тузилмаси ҳамда Ваҳдат шаҳри ички ишлар бўлимига ҳужум уюштиришда айбланган эди.
Тожикистон Бош прокуратураси мудофаа вазирининг собиқ ўринбосари, генерал майор Абдуҳалим Назарзода ҳамда мудофаа вазирлиги полковниги Жунайдулло Умаровга нисбатан жиноий иш очди. Назарзода ва Умаров мамлакат Жиноят кодексининг тўртта— «терроризм», «давлатга хиёнат», «экстремистик гуруҳлар тузиш» ва «диверсия» моддалари билан айбланмоқда.
Изоҳ (0)