Ramit darasida Tojikiston mudofaa vaziri sobiq o‘rinbosari Abduhalim Nazarzoda jinoiy guruhining yana 18 nafar a’zosi qo‘lga olindi, 134 dona o‘qotar qurol va o‘q-dorilar musodara qilindi, deya xabar bermoqda “RIA Novosti” IIVga tayanib.
Bundan tashqari, mudofaa vaziri sobiq o‘rinbosarining qurolli guruhi yetti a’zosi ixtiyoriy ravishda taslim bo‘lgan.
IIV ma’lumotlariga ko‘ra, 4-sentabrdan buyon operatsiyalar davomida Nazarzodaning jami 130 ga yaqin tarafdorlari qo‘lga olingan, yana 22 nafari yo‘q qilingan.
Eslatib o‘tamiz, Tojikiston Ichki ishlar vazirligi 4-sentabr kuni iste’foga chiqarilgan mudofaa vazirining o‘rinbosari Abduhalim Nazarzodani mudofaa vazirligining Dushanbedagi markaziy tuzilmasi hamda Vahdat shahri ichki ishlar bo‘limiga hujum uyushtirishda ayblangan edi.
Tojikiston Bosh prokuraturasi mudofaa vazirining sobiq o‘rinbosari, general-mayor Abduhalim Nazarzoda hamda mudofaa vazirligi polkovnigi Junaydullo Umarovga nisbatan jinoiy ish ochdi. Nazarzoda va Umarov mamlakat Jinoyat kodeksining to‘rtta— “terrorizm”, “davlatga xiyonat”, “ekstremistik guruhlar tuzish” va “diversiya” moddalari bilan ayblanmoqda.
Izoh (0)