Калифорниянинг Сан-Хосе шаҳридаги федераль судья Люси Кох тўрт компания бир-биридан ходимларни оғдириб олмаслик ҳақида қонунга зид келишув бўйича иш олиб боргани учун (мазкур ҳаракат натижасида ходимлар нисбатан кўпроқ маош олиш имкониятидан маҳрум бўлган) жами 415 миллион доллар миқдорида товон пули тўлаши керак. Бу ҳақда «RBK» хабар бермоқда.
Монополияга қарши кураш бўйича қонунчиликни бузган Apple, Google, Intel ва Adobe жазога тортилган. Улар қарийб 65 минг нафар даъвогарнинг ҳар бирига, уларнинг ҳуқуқлари поймол этилгани учун, 5,8 минг доллардан тўлаши керак. Компаниялар бу қарорга рози бўлган.
Корпоратив электрон почтани ўрганишга асосланган тергов ишлари давомида «ҳужум қилмаслик ҳақидаги пакт» Apple’нинг марҳум раҳбари Стив Жобсга маълум қилингани ҳолда имзолангани аниқланди — айнан у мазкур ғоянинг бош тарафдори бўлган. Компанияларнинг раҳбарлари келишувни имзолаган компаниялардан иқтидорли дастурчилар ва бошқа техник ходимларни нисбатан кўпроқ маош таклиф қилиш йўли билан оғдириб олмаслик мажбуриятини олган. Мазкур компанияларнинг барчаси Кремний водийсида, бир-бирига яқин масофада жойлашган.
2011 йилда берилган шикоят 2005—2009 йилларга оид ҳуқуқбузарликларни қамраб олади. Дастлаб даъво қилинган пул миқдори 3 миллиард долларга тенг эди ва АҚШнинг аксилмонополия қонунчилигига мувофиқ, бу миқдор уч баробар оширилиши мумкин эди. Шу йўл билан, даъвогарлар ҳар бири киши учун 100 минг доллардан, адвокатлар эса жами 85 миллион доллар олишни мақсад қилганди. Бироқ охир-оқибат адвокатлар ўзи хоҳлаганидан икки баробар кам пул — 41 миллион доллар билан кифояланишга мажбур бўлди.
Associated Press агентлиги маълумотларига кўра, 2011 йилдан бери Кремний водийсида иқтидорли дастурчиларни қўлга киритиш бўйича рақобат кучайган ва энди бошқа компаниялардаги истиқболли дастурчилар учун турли рағбатлантирувчи шароитлар таклиф қилинмоқда. Хусусан, Tesla Motors компанияси асосчиси Илон Маск унинг дастурчиларига Apple 60 фоиз кўп маош, шунингдек, шартнома имзолаганда бериладиган бир марталик 250 минг долларлик бонус таклиф қилгани ҳақида сўзлаб берганди.
Изоҳ (0)