«Шарқ тароналари» мусиқий фестивали ёпилиши доирасида ёғдули-мусиқий шоу — 7 дақиқалик 3D-mapping намойиш этилди. Бу ҳақда O‘zEOAVMA вакили Сарвар Наврўзов «Дарё»га маълум қилди.
Европа ва АҚШнинг йирик шаҳарларида намойиш қилинадиган кўнгилочар шоулардан фарқли равишда Регистон майдонидаги томоша аниқ тарихий далиллар ва воқеаларга асосланган.
«Бу унутилмас шоу бўлди. Мен кўп мамлакатларда бўлганман, бироқ тарихий воқеаларга нисбатан бундай эътиборни ҳеч қаерда ҳис қилганим йўқ. Ғаройиб сиймолар, худди жонлидек, биз суйган Шарқнинг ноёб эстетикасини намойиш этди», — дея ўз таассуротлари билан ўртоқлашди франциялик Анора Габриэл.
«Бу шоу Ўзбекистонга ташриф буюрадиган чет эллик туристлар учун ўзига хос маёқ бўлади. Бундай томошани ҳеч қачон кўрмаганман. Бунинг устига асосийси – у реал тарихий далилларга асослангани учун оригиналдир», — дейди Жанубий Корея вакили Парк Юен Хие.
«Бизнинг Янги Зеландияда бундай шоулар жуда оммавийлашган. Бироқ улар барча маърифий жиҳатларини унутиб, томошабоп бўлишига ҳаракат қилишади. Ўзбекистон бошқа йўлдан борди — дунёда биринчи марта тарихий воқеалар асосига қурилган, уйдирмаларсиз, буюк тарихий шахслар ва уларнинг Шарқ маданиятига қўшган ҳиссаси ҳақида кўп маълумот берувчи асар яратилди», — дея қўшимча қилди Никола Пасени.
Шоунинг тўлиқ 30 дақиқалик версияси жорий туристик мавсумда тақдим этилади. Ҳозирда 100 дан ортиқ маҳаллий ва чет эллик дизайнерлар, тарихчилар, 3D-mapping мутахассислари, режиссёрлар ва операторлар шоу устидаги ишларни якунлаш арафасида турибди.
Изоҳ (0)