Янги 2015—2016-ўқув йилида 9698 та умумтаълим мактабларида 4,5 миллион ўқувчи таълим олади, шундан 631 минг 274 нафар болалар 1-синфга қадам қўйди. Уларнинг барчасига «Президент совғаси» сифатида тақдим этиш учун 12 номдаги ўқув қуроллари ва ўқувчи портфели (ранец)дан, тақсимот асосида таълим муассасаларига етказиб берилди. Бу ҳақда Халқ таълими вазирлиги матбуот хизмати хабар бермоқда.
2-сентябрь куни Республиканинг барча умумтаълим мактабларида янги ўқув йили бошланиши муносабати билан «Билимлар куни» тадбирлари бўлиб ўтди.
Таълим муассасалари моддий-техник базасини мустаҳкамлаш мақсадида 2015 йилда инвестиция дастури доирасида республика бўйича 384 та мактабда қурилиш-таъмирлаш ишлари амалга оширилди. Шундан 29 таси янгидан қуриб фойдаланишга топширилган бўлса, 219 таси реконструкция қилинди, 136 таси капитал таъмирланди. Ушбу мақсадларга жами 341,8 миллиард сўм маблағ ажратилди.
Болалар спортини ривожлантириш жамғармаси томонидан 239,3 миллиард сўмлик 221 та спорт иншоотлари ҳамда 5 та болалар мусиқа ва санъат мактабларини қуриш, реконструкция қилиш ишлари бажарилди.
Жорий йилда жами 4517 та таълим муассасаларини мебель, ўқув-лаборатория асбоб-ускуналари, компьютер техникаси, спорт анжомлари ва мусиқа чолғу асбоб-ускуналари билан жиҳозлаш ишлари амалга оширилмоқда. Қолаверса, умумтаълим мактабларининг 1—4-синфлар чет тиллари кабинетларига 13,5 миллион АҚШ долларилик 6775 та тўплам синф ахборот-коммуникация ва ўқитишнинг техник воситалари етказилади.
Янги ўқув йилида ўқувчиларни дарслик ва ўқув-методик қўлланмалар билан таъминлаш масаласига ҳам жиддий эътибор қаратилди. Жумладан, янги ўқув йили учун 454 номдаги 25,7 миллион нусха дарсликлар ва ўқув-методик қўлланмалари чоп этилиб, жойларга етказилди.
Изоҳ (0)