Наманган вилоятида фирибгарлар гуруҳининг фаолиятига нуқта қўйилди, улар амалга оширган операциялар ҳажми бир неча миллиард сўмдан ошади, дея хабар бермоқда вилоят ИИБ ахборот маркази.
Улар нақд пул етишмовчилиги туфайли кўпчилик автомобиль эгалари машиналарни бўлиб-бўлиб тўлаш шарти билан сотаётганидан фойдаланиб, автомобиль олди-сотдиси билан шуғулланган ва кўплаб фуқароларни чув туширган.
Наманганлик йигит Тошкентдаги Сирғали автомобиль бозорида бир киши билан танишади ва ундан янги Spark автомобилини 16 минг долларга сотиб олиш таклифини олади. Йигит пулнинг 4 мингини ҳозироқ, қолганини ҳар ойда минг доллардан бериб туриши керак эди. У машинани Наманганга келтириб, уни ўз танишига 10 минг долларга пуллайди ва нақд пулни чўнтагига уради. Вақт ўтиши билан жиноий гуруҳ шаклланади. Тахминан шу схемада улар қўлидан 30 га яқин автомобиль ўтади.
Ушбу иш бўйича тўрт кишига нисбатан Ўзбекистон Республикаси Жиноят Кодексининг 168 (Фирибгарлик) ва 228-моддалари (Ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) бўйича айблов қўйилди ва улар тегишли жазога тортилди.
Изоҳ (0)