Голландлар Украинада қулаган «Боинг» ҳақидаги ҳисобот эълон қилинадиган санани маълум қилди

Малайзия «Боинг»ининг Украина шарқида қулаши билан боғлиқ тўлиқ ҳисобот 13 октябрь куни эълон қилинади. Бу ҳақда, Meduza хабарига кўра, авиаҳалокат юзасидан тергов олиб бораётган Голландия хавфсизлик бошқармаси ахборотида маълум қилинган.

Самолёт ҳалокати қурбонларининг қариндошлари тергов хулосалари билан олдиндан таништирилади.

Malaysia Airlines авиакомпаниясининг «Боинг» самолёти 2014 йил 17 июль куни Донеск остонасида қулаган эди. Самолёт бортида бўлган 298 кишининг барчаси ҳалок бўлган. Йўловчиларнинг асосий қисми голландиялик бўлгани сабаб, ҳалокат сабабларини тергов қилиш билан, асосан, Голландия шуғулланди.

2014 йил сентябрида Голландия терговнинг дастлабки натижаларини эълон қилганди. Уларда самолёт кўплаб миқдордаги элементлар билан тўқнашгани ҳақида хулоса бор эди.

Расмий Киевнинг даъвосига кўра, самолёт Украина шарқидаги айирмачилар назорати остидаги ҳудудда турган «Бук» ракета мажмуаси томонидан уриб туширилган. Россия Тергов қўмитаси эса, самолёт Украина ҳарбий-ҳаво кучлари томонидан уриб туширилган, деган версияни расман кўриб чиқмоқда.

«Бук» зенит-ракета мажмуаларини ишлаб чиқарувчи «Алмаз-Антей» концерни ҳам ҳодиса юзасидан ўз текширувини ўтказиб, самолёт Украина армияси ихтиёрида зенит-ракета мажмуаси томонидан уриб туширилган, деган хулосага келганди.