Gollandlar Ukrainada qulagan “Boing” haqidagi hisobot e’lon qilinadigan sanani ma’lum qildi

Malayziya “Boing”ining Ukraina sharqida qulashi bilan bog‘liq to‘liq hisobot 13-oktabr kuni e’lon qilinadi. Bu haqda, Meduza xabariga ko‘ra, aviahalokat yuzasidan tergov olib borayotgan Gollandiya xavfsizlik boshqarmasi axborotida ma’lum qilingan.

Samolyot halokati qurbonlarining qarindoshlari tergov xulosalari bilan oldindan tanishtiriladi.

Malaysia Airlines aviakompaniyasining “Boing” samolyoti 2014-yil 17-iyul kuni Donesk ostonasida qulagan edi. Samolyot bortida bo‘lgan 298 kishining barchasi halok bo‘lgan. Yo‘lovchilarning asosiy qismi gollandiyalik bo‘lgani sabab, halokat sabablarini tergov qilish bilan, asosan, Gollandiya shug‘ullandi.

2014-yil sentabrida Gollandiya tergovning dastlabki natijalarini e’lon qilgandi. Ularda samolyot ko‘plab miqdordagi elementlar bilan to‘qnashgani haqida xulosa bor edi.

Rasmiy Kiyevning da’vosiga ko‘ra, samolyot Ukraina sharqidagi ayirmachilar nazorati ostidagi hududda turgan “Buk” raketa majmuasi tomonidan urib tushirilgan. Rossiya Tergov qo‘mitasi esa, samolyot Ukraina harbiy-havo kuchlari tomonidan urib tushirilgan, degan versiyani rasman ko‘rib chiqmoqda.

“Buk” zenit-raketa majmualarini ishlab chiqaruvchi “Almaz-Antey” konserni ham hodisa yuzasidan o‘z tekshiruvini o‘tkazib, samolyot Ukraina armiyasi ixtiyorida zenit-raketa majmuasi tomonidan urib tushirilgan, degan xulosaga kelgandi.