2004 йилги Олимпиада чемпиони, америкалик спринтер Жастин Гэтлин матбуот уни ёвузлик билан таққослагани учун Британия ОАВларига бойкот эълон қилди, дея хабар бермоқда The Guardian спортчининг агентига таяниб.
«Жастин, худди мен каби, Британия ОАВлари у ҳақда нохолис фикр билдирмоқда, деб ўйлайди. Сўнгги пайтларда улар у ҳақда яхши гаплар гапирмаяпти. Ҳадеб допинг ҳақида эсламоқда», — дея аниқлик киритди Гэтлиннинг вакили.
Енгил атлетикачининг норозилигига британиялик журналистларнинг мақола ва мулоҳазалари сабаб бўлди. Хусусан, The Guardian нашрида эълон қилинган мақола спортчига хуш келмади, унда Пекиндаги жаҳон чемпионатида Гэтлиннинг ямайкалик Усейн Болт билан кураши «яхшилик ва ёвузлик ўртасидаги жанг» деб аталган, бунда 2006 йилдаги допинг шов-шуви назарда тутилган эди. Ўшанда Гэтлин қонида тестостерон меъёридан ортиқ миқдорда бўлгани сабабли тўрт йилга дисквалификация қилинган эди.
Изоҳ (0)