Италиянинг Милан шаҳрида байдарка ва каноэда эшкак эшиш бўйича ўтказилган жаҳон чемпионати баҳслари ниҳоясига етди, деб хабар беради Ўзбекистон Миллий олимпия қўмитаси матбуот хизмати.
2016 йили Рио-де-Жанейро шаҳри (Бразилия)да ўтказиладиган XXXI ёзги Олимпиада ўйинларининг лицензиялари ўйналган мазкур дунё биринчилигида Ўзбекистон шарафини 11 нафар спортчи – Вадим Меньков, Герасим Кочнев, Серик Мирбеков, Дилноза Раҳматова, Нилуфар Зокирова (барчаси каноэда), Алексей Мачалов, Вячеслав Горн, Эрнест Ирназаров, Олья Умаралиева, Юля Борзова (барчаси байдаркада) ҳимоя қилди.
Ўта муросасиз руҳда бўлиб ўтган мусобақалар якунларига кўра, ўзбекистонликлардан энг юқори кўрсаткичга байдаркачи Алексей Мачалов ва каноэчилар Дилноза Раҳматова ҳамда Нилуфар Зокирова эришди.
Алексей Мачалов байдаркада 500 метр масофага бўлиб ўтган пойгада «А» гуруҳи иштирокчилари орасида ҳал қилувчи финал босқичида иштирок этди ва якунда 8-ўрин билан кифояланди. Ўзбекистонлик каноэчи қизлар ҳам икки кишилик қайиқда ўтказилган пойгаларда кучли сакизликдан ўрин эгаллади. Афсуски, ушбу натижалар ўзбекистонликларга Рио—2016 ўйинларининг йўлланмасини қўлга киритишлари учун етарли эмас эди.
Энди ўзбекистонлик байдарка ва каноэчилар жорий йилнинг ноябрь ойида Индонезияда ўтказиладиган Осиё чемпионатига қизғин ҳозирлик кўради. Сабаби мазкур қитъа чемпионатида ҳам XXXI ёзги Олимпиада ўйинларининг йўлланмалари ўйналади.
Изоҳ (0)