2015 йилнинг биринчи ярми давомида биргина Бухоро вилояти божхона бошқармаси ходимлари томонидан ҳуқуқни муҳофаза қилувчи бошқа идоралар вакиллари билан ҳамкорликда 723 та божхона қоидабузарликлари аниқланиб, қиймати 7 миллиард сўмлик товар-моддий бойликлар ашёвий далил сифатида олиб қўйилди. Бу ҳақда Давлат божхона қўмитаси расмий сайти хабар берди.
Жумладан, «Хўжадавлат» темирйўл чегара божхона пости ходимлари томонидан Ўзбекситонга кириб келган юк поездини божхона назоратидан ўтказиш чоғида контейнерлардан бирида хусусий тадбиркор номига Бирлашган Араб Амирликларидан юборилган юклар билан юк кузатув ҳужжатларидаги маълумотлар ўртасида тафовутлар мавжудлиги аниқланди.
Маълум бўлишича, контейнердаги қиймати 507 миллион сўмдан ортиқ бўлган авто эҳтиёт қисмлари, маиший техника жиҳозлари, уй-рўзғор буюмлари, идиш-товоқлар, косметик ва гигиеник воситалари ва ҳаттоки болалар тагликлари, хуллас 253 турдаги товар-моддий бойликларини ҳеч қандай ҳужжатларсиз Ўзбекистон ҳудудига олиб киришга уринишган.
Мазкур ҳолат юзасидан Ўзбекистон Республикаси Жиноят Кодексининг тегишли моддаси билан жиноий иш қўзғатилиб, Жиноят ишлари бўйича Тошкент шаҳар Сирғали туман судининг ҳукмига асосан юқорида кўрсатиб ўтилган қиймати 507 миллион сўмдан ортиқ бўлган товар моддий бойликлари давлат эгалигига ўтказилди. Юк эгасига нисбатан ҳам жазо муқаррарлиги таъминланди.
Изоҳ (0)