Ўзбекистонда аҳолининг эҳтиёжманд қатламларига кўрсатилаётган ёрдам турларини кенгайтириш юзасидан кўплаб лойиҳалар ҳаётга изчил татбиқ этилмоқда. «Кексаларни эъзозлаш йили» Давлат дастури асосида бу борадаги ишлар кўлами янада кенгайди, деб хабар беради ЎзА.
Ўзбекистон Касаба уюшмалари федерацияси кенгаши, «Маҳалла» хайрия жамоат фонди Юнусобод тумани бўлими ва қатор ташкилотлар ҳамкорлигида Ўзбекистон мустақиллигининг 24 йиллигига бағишлаб ўтказилган ижтимоий акцияда Юнусобод туманида истиқомат қилувчи имконияти чекланган, ижтимоий ҳимояга муҳтож оилалар вакиллари иштирок этди.
Туманда имконияти чекланган фуқароларни қизиқишидан келиб чиқиб фойдали меҳнатга жалб этиш, уларни маҳаллаларда ташкил этилган ҳунармандлик, тикувчилик, тўқувчилик каби тўгаракларга кенг жалб этиш борасида тизимли иш олиб борилаётир. Шу орқали уларнинг жамиятда ўз ўрнини топишига кўмаклашиш ва оиласи фаровонлигини таъминлаш кўзда тутилган.
Ушбу акция доирасида кам таъминланган оилалар, эҳтиёжманд фуқаролар, нуронийлар ҳолидан хабар олиниб, уларнинг уй-жой ва маиший шароитини яхшилаш чоралари кўрилди. Тадбир ташкилотчилари томонидан алоҳида эҳтиёжманд фуқароларга уй-рўзғор буюмлари ва бошқа зарур анжомлардан иборат байрам совғалари топширилди.
Изоҳ (0)