Ахборот технологиялари ва коммуникацияларини ривожлантириш вазирлиги томонидан 21 август куни Алоқа тарихи музейида Ўзбекистон Республикасининг Очиқ маълумотлар портали фаолиятини такомиллаштириш, истиқболда ривожлантириш юзасидан 2015 йилнинг 7 августида Вазирлар Маҳкамаси томонидан «Очиқ маълумотлар тақдим этилиши ҳисобга олинган ҳолда Интернет тармоғида Ўзбекистон Республикасининг Ҳукумат порталини янада такомиллаштириш чора-тадбирлари тўғрисида»ги 232-сонли қарорига бағишланган матбуот анжумани ташкил этилди.
2015 йилнинг март ойида синов режимида data.gov.uz манзилида ишга туширилган Очиқ маълумотлар портали Ўзбекистон Республикасининг «Давлат ҳокимияти ва бошқаруви органлари фаолиятининг очиқлиги тўғрисида»ги қонунида белгилаб берилган мақсад-вазифаларини амалга ошириш, амалда татбиқ этиш мақсадида ташкил қилинган бўлиб, Ўзбекистонда ривожланиб бораётган «электрон ҳукумат» тизимининг муҳим таркибий қисмларидан бири ҳисобланади. Очиқ маълумотлар портали Ўзбекистон Республикасининг Ҳукумат портали (www.gov.uz) доирасида фаолият кўрсатади. Портал жисмоний ва юридик шахсларга давлат органлари фаолиятига оид маълумотларни машина ўқийдиган шаклда эркин фойдаланиш учун бепул тақдим қилади.
2013—2020 йилларда Ўзбекистон Республикаси Миллий ахборот-коммуникация тизимини ривожлантириш комплекс дастури амалга оширилишини мувофиқлаштириш республика комиссияси томонидан давлат ва хўжалик бошқаруви органлари, маҳаллий давлат ҳокимияти органларининг расмий сайтларида ва Очиқ маълумотлар порталида эълон қилиниши лозим бўлган очиқ маълумотлар тўпламлари рўйхати тасдиқланиб, Ҳукумат порталида эълон қилинади.
Бугунги кунгача Очиқ маълумотлар порталида 50 та давлат органларининг 550 турдаги очиқ маълумотлари эълон қилинган ва мазкур маълумотлар фойдаланувчилар томонидан 100 минг маротабадан зиёд юклаб олинган. Жумладан, Халқ таълими вазирлиги, Ташқи ишлар вазирлиги, Давлат солиқ қўмитаси, Давлат рақобат қўмитаси, Марказий банк, Соғлиқни сақлаш вазирлиги ва бошқа давлат органлари томонидан очиқ маълумотлар тақдим қилиб келинмоқда.
Айтиш керакки, давлат органларининг фаолиятига оид очиқ маълумотларнинг фойдаланиш учун эркин ва қулай бўлиши жамиятдаги ижтимоий муносабатларнинг мустаҳкамланиши, давлат ва фуқаролар, давлат ва тадбиркорлик субъектлари ўртасидаги алоқаларнинг янада мустаҳкамланиши, давлатнинг иқтисодий ривожи, бошқарувдаги самарадорлигига хизмат қилади. Шу билан биргаликда, очиқ маълумотларнинг эълон қилиниши фуқароларнинг ахборот олиш ва уни тарқатиш, ахборотдан фойдаланиш каби муҳим конституциявий ҳуқуқларининг янада кенг таъминланиши, истиқболда «электрон ҳукумат» тизимининг муваффақиятли татбиқ этилишига пойдевор бўлиб хизмат қилади.
Матбуот анжуманида мутахассислар оммавий ахборот воситалари вакилларининг мавзу юзасидан саволларига жавоб берди.
Изоҳ (0)