Ўзбекистон мустақиллигининг 24 йиллиги муносабати билан Ўзбекистон Миллий кутубхонасида «Бетакроримсан, ягонасан, она Ватаним — Ўзбекистоним!» номли фото-кўргазма очилди. Бу ҳақда кутубхона сайтида хабар берилган.
Кўргазма «Ўзбекистон: кеча ва бугун», «Ўзбекистон дунё нигоҳида», «Юксак марраларга интил, тенгдошим!», «Мустақиллик – бу ҳуқуқ демакдир» ва «Ватан фидойи фарзандларини унутмайди!» рукнларини ўз ичига олади.
«Ўзбекистон: кеча ва бугун» рукни остидаги китоблар ўзбек халқининг ҳаётини тубдан ўзгартирган ва ўзлигини англашига замин бўлган мустақилликка эришиш тарихидан, Ўзбекистон Республикасининг ўз ривожланиш ва тараққиёт йўли, ўтказилаётган ислоҳотлар ва забардаст ўзбек халқининг меҳнати, унинг маънавий қадриятлари ва миллий мероси ҳақида ҳикоя қилади. Бу ерда, шунингдек, Ўзбекистон Президентининг бозор иқтисодиёти шароитида суверен жамият, озод ва мустақил ҳаётга йўналтирилган демократик давлат қуриш масалаларига бағишланган асарлари ўрин олган.
«Ўзбекистон дунё нигоҳида» деб номланган кўргазмада Ўзбекистоннинг хорижий мамлакатлар билан сиёсий, молиявий ва маданий ҳамкорлиги ҳақида ҳикоя қилувчи республикамизда ва хорижда нашр қилинган ўзбек, рус, инглиз, француз, немис, корейс тилларидаги сара китоблар тақдим этилган.
Кўргазманинг «Юксак марраларга интил, тенгдошим!» деб номланган рукни остида намойиш этилган китоблар илм эгаллаш баробарида ватан равнақига ўз хиссасини қўшишни мақсад деб билган Ўзбекистоннинг иқтидорли ва салоҳиятли ёш авлоди вакиллари ҳақида ҳикоя қилади.
«Мустақиллик – бу ҳуқуқ демакдир» рукни остида тақдим этилган китоблар фойдаланувчиларни Ўзбекистон Республикасининг демоктратик жамият қуриш йўлида фуқароларнинг ҳуқуқий кафолатларини таъминловчи китоблар билан таништиради. Бу ерда миллий ғоя, маънавий ва ҳуқуқий таълим, Ўзбекистон солиқ, божхона ва адлия тизимларининг шаклланиши ҳақида ҳикоя қилувчи китоблар тақдим этилган.
«Ватан фидойи фарзандларини унутмайди!» рукнида аждодларимизнинг ўзбек халқининг озодлиги йўлидаги фидоийликлари, оғир йилларида бошидан кечирган қийинчиликлари ҳақида сўзловчи китоблар жамланган. Шунингдек, бу китоблар бизларни халқимиз қаҳрамонларини унутмаслигимизга ва уларга ҳамиша ҳурматни бажо келтиришга даъват этади.
Кўргазмага ташриф буюрганлар Ўзбекистон Республикаси ташкил этилиши тарихи, унинг кечаси ва бугуни, ўз тараққиёт йўли, ўзбекистон халқининг маданий ва миллий қадриятлари тўғрисида кўпгина қизиқарли маълумотларга эга бўлади.
Ўзбекистон Республикасининг 24 йиллигига бағишланган мазкур кўргазма жорий йилнинг 3 сентябрига қадар давом этади.
Изоҳ (0)