Хитойнинг Тяньцзинь шаҳридаги логистика компаниясига тегишли хавфли моддалар сақланувчи омборхонада 13 августга ўтар кечаси юз берган кучли портлаш қурбонлари сони 50 кишига етди, 701 киши касалхонага ётқизилган. Бу ҳақда «РИА Новости» хабар бермоқда.
Аввалроқ 44 киши ҳалок бўлгани, 521 киши эса касалхонага ётқизилгани, улардан 52 нафарининг аҳволи оғирлиги ҳақида хабар берилган эди. Ҳозирги вақтга келиб оғир аҳволдаги жабрланувчилар сони 71 кишига етган.
Маҳаллий вақт билан 12 август, чоршанба куни соат 23:30 да Бинхай туманидаги Ruihai Logistics компаниясига тегишли, хавфли моддалар сақланувчи омборхоналарда 30 сония фарқ билан иккита портлаш юз берди.
Портлаш шу қадар кучли бўлганки, зарбдан юзага келган силкинишни маҳаллий сейсмология хизмати қайд этган. Портлаш қуввати тротил эквивалентида мос равишда 3 ва 21 тоннага тенг бўлган.
Юзлаб ўт ўчирувчилар ҳали ҳам портлашдан кейинги оловга қарши курашмоқда. Тяньцзинь ўт ўчириш хизматидан маълум қилишларича, омборхонада хавфли моддалар бор, шу сабабли ҳам ёнғиннинг қандай ривожланишини олдиндан айтиб бўлмайди.
Изоҳ (0)