Бразилиянинг Сальвадор шаҳрида спорт курашлари бўйича ёшлар ўртасида давом этаётган жаҳон чемпионатида яна бир ўзбекистонлик спортчи Ислом Баҳромов совриндорлар сафидан жой олди. Бу ҳақда Ўзбекистон Миллий олимпия қўмитаси матбуот хизмати хабар бермоқда.
Юнон-рум кураши бўйича оғирлик вазни 55 килограммгача бўлган полвонлар мусобақасида гиламга чиққан Ислом Баҳромов ўта муросасиз кечган беллашувлар якунига кўра бронза медали соҳиби бўлди.
Ушбу вазн тоифасида Мурод Моммадов (Озарбайжон) биринчи, болгариялик Юто Христов эса иккинчи ўринни эгаллади. Яна бир бронза медалга эса венгриялик Эрик Торба сазовор бўлди.
Эслатиб ўтамиз, жаҳон чемпионатининг биринчи кунида юнон-рум кураши бўйича Ўзбекистон терма жамоаси аъзоси Жавоҳир Мираҳмедов бронза медали совриндори бўлган эди.
Таъкидлаш жоизки, Жавоҳир Мираҳмедов ва Ислом Баҳромовдан ташқари мазкур дунё биринчилигида Ҳожиакбар Ўткиров (-50 кг), Давлатбек Исматов (-60 кг), Сирожиддин Ҳасанов (-66 кг) эркин кураш бўйича мусобақаларда, Қамариддин Зайниддинов (-60 кг) ҳамда Арам Варданян (-66 кг) юнон-рум кураши баҳсларида гиламга тушади.
Изоҳ (0)