Жанубий Корея собиқ президенти Ким Дэ Чжуннинг аёли Ли Хи Хо КХДРга уюштирган тўрт кунлик сафарини якунлади. «Zakon.kz» хабарига кўра, 93 ёшли хонимнинг ташрифи Шимолий Корея етакчиси Ким Чен Ин таклифи билан амалга ошган бўлса-да, аёл давлат раҳбари томонидан қабул қилинмаган.
Ташриф давомида Ли Хи Хо Пхеньяндаги Она ва бола уйи, меҳрибонлик уйи, болалар касалхонасида меҳмон бўлган. «Бу болаларнинг қўлидан тутарканман, миллий бўлиниш дардини келажак авлодларга қолдириб бўлмаслигини ҳис қилдим», — деди собиқ президентнинг турмуш ўртоғи Сеулга қайтиб келганидан сўнг.
Жанубий Корея собиқ президенти Ким Дэ Чжун ва КХДРнинг аввалги раҳбари Ким Чен Ир 2000 йил 15 июнь куни Пхеньянда қўшма баёнот имзолаб, Кореяни тинч йўл билан мустақил равишда бирлаштириш йўлларини белгилаб олганди.
«Пхеньянга сафарим давомида оддий бир фуқаро сифатида ҳеч қандай расмий ишларни бажармадим, бироқ 15 июнь баёноти руҳини қўллаб-қувватлаш олдидаги қарздорлик ҳиссидан қутулдим», — деди аёл.
2009 йили вафот этган Ким Дэ Чжун КХДР билан олий даражада музокаралар ўтказиш учун Пхеньянга аёли билан ташриф буюрган илк Жанубий Корея президенти бўлганди. У икки корейс давлати ўртасидаги илиқлик сиёсатига тамал тошини қўйганди, бироқ бу ташаббус кейинчалик Сеулда ҳокимият тепасига келган консерватив кучлар томонидан рад этилди.
Изоҳ (0)