Аргентинада «Формула-1» бўйича афсонавий пойгачининг жасади қабрдан кавлаб олинди

«Формула-1»нинг афсонавий аргентиналик пойгачиси Хуан Мануэль Фанхионинг жасади эксгумация қилинди, деб хабар беради «Newsru.com».

Суд қарорига кўра, унинг ДНКсидан намуна олиш учун пойгачининг жасади моргга олиб кетилди.

Фанхио танасининг намунаси унинг ўғли эканлигини таъкидлаётган 70 ёшли икки эркакнинг даъвосини қондириш ёки рад этиш учун керак.

Фанхио ҳеч қачон уйланмаган ва расман болаларини тан олмаган. Аммо унинг биографлари пойгачи деярли 20 йил бир аёл билан яқин муносабатда бўлганини таъкидламоқда.

Унинг ўғли эканлигини даъво қилаётган биринчи эркак Оскар Эспиноса бўлиб, у маълум бир вақт «Формула-3» пойгаларида қатнашган ва уни кўпчилик Канчо Фанхио номи билан танийди.

Иккинчи эркак эса Рубен Васкес бўлиб, у алоҳида даъво билан чиққан. Васкеснинг сўзларига кўра, 2012 йилда онаси вафот этаётганида у Фанхионинг ўғли эканлигини айтиб кетган. У Фанхионинг меросига қизиқмаслигини таъкидлади.

«Мен шунчаки Фанхионинг ўғли, деб тан олинишни истайман», — деди Васкес.

Фанхио «Формула-1»да 7 мавсумни ўтказган ва 5 марта (1951, 1954, 1955, 1956 ва 1957 йилларда) жаҳон чемпиони бўлган. Унинг чемпионлик унвонлари бўйича рекордини ярим асрдан кейин Михаэл Шумахер 2003 йилда янгилаган. Хуан Мануэль Фанхио 1995 йилда оламдан ўтган.