Россиянинг Қозон шаҳрида ташкил этилган сув спорти бўйича жаҳон чемпионати баҳсларида ярим финалга қадар етиб борган ўзбекистонлик Владислав Мустафин россиялик телешарҳловчи Дмитрий Губерниевнинг хатоси билан боғлиқ вазиятга изоҳ берди, деб хабар қилади «Sports.uz».
Эслатиб ўтамиз, Губерниев ўзбекистонлик спортчини шарҳ вақтида Беларусь вакили сифатида таништирганди.
«Жуда ғалати ҳолат юзага келди. Маълум бўлишича, FINA (Халқаро сузиш федерацияси) рўйхатида мени нима учундир Беларусь вакили сифатида қайд этишган экан. Афтидан, шарҳловчи Губерниев ҳам шу сабаб мени шундай таништирган. Албатта, стартга чиққан вақтим ҳеч нарсани сезмадим. Бу ҳақда стартдан сўнг менга айтишди. Ҳозир бу ҳолатга катта мураббийимиз ойдинлик киритмоқда», — деди Мустафин.
Изоҳ (0)